خالد أخازي
جميل ورائع أن يتحدث بطلاقة وتخراج العينين خونا المهدي… متعه الله بهداية الرفادة… وحسن الوفادة… وتثليث القيادة..
أن يتحدث عن وضع حد لمقاولات صحفية سماها حسب فهمنا أسرية…
الأب وابنه…
أمر مغرٍ ومثير… وجذاب… يدغدغ العواطف والوجدان…
والله… من حيث المبدأ لا نرى مانعا من استهداف مقاولات تشغل الزوج والابن والأخ والصهر وذوي القربى….دون كفاءات صحفية، وفي إطار ” ديالنا فينا”…
أقصد العمل الصحفي المحض….
لا في مجالات أخرى تتعلق بالتدبير المالي والإداري والتجاري…. وحتى التوزيع والمحاسبة….
لكن أليس جديرا بالوزير الوسيم صاحب ثلاث حقائب وزارية، وثلث قيادة حزبية، أن يحدث صاحبه أخنوش عن “توزير” ذوي القربى من عائلته المالية والاقتصادية…؟
فنحن على ملة أخنوش… ومنه تعلمنا… ” بلاصي” دوز ديم… والأقربون أولى بالنعمة… والرفقة والحقيبة والغنيمة…
والقرابة انواع… مقاولاتية… حزبية… سياسية… ” طوفانية خفية”…
ومن أخنوش ميسي الصفقات ورونالدو التوزيرات…تعلمنا… لا عيب في الريع إن كان بالتشريع…. ولا عيب في السخاء باسم الخفاء…
خوي…. راك… خرجت البيست… راك غا داوي…
فأنْ يوظف صاحب مقاولة إعلامية ذويه أهون على المجتمع من أن يتم تعيين فريق من الوزراء من شركات أخنوش وحرمه… بلا حيا بلا حشمة…
وما خفي من علائق وملفات فيها الباطن أشد على الوطن من توظيف قريب في موقع يحتضر
شوف لمن تعاود خبيرك… سمح لي….
فأيهما أشد لؤما ولا ينسجم مع الحكامة والليبرالية… وكاع… النيوليبرالية… في نظرك قريب مدير موقع… أو مستخدم أخنوش أو حرمه في موقع وزير…؟
دابا نتوما دايرين زبلة وجايين تعطيو دروس في الشفافية…
الله… الله… بان ليك غير الأقارب ما بانش ليك العقارب…
ياريت… خونا المهدي… يجيبنا عن سؤال، توظيف الدولة في مشاريع أخنوش… يفهمنا… صفقة التحلية والفيول والسيارة العجيبة … وموضة… نقص اللحم… جيب آفلان من الخارج… نقص الزيت جيبو آعبد عبد العظيم من الصبليون… وتهناو كاين الدعم والإعفاء والسخاء…
يا مهدي الشباب والاتصال والثفاقة…
راه ملف الثقافة والشباب أكبر من نقاش حول موقع يشغل أفراد من أسرة واحدة…
والدولة حين تصبح ضيعة… بالقانون… والتريتور… والشطيح… علينا أن نردد اللطيف عصر كل يوم…
يا خويا… خلينيا نحترموك… راك من شجرة طيبة…
فأمر حكومتكم لا يتعلق بالأفراد بل بأطر الشركات… بالاستثمار بأموال عمومية من موقع السلطة التتفيذية والإدارية…
واش كاين ف شي دولة رئيس مجلس النواب… متهرب ضرائبي وعندو معمل سري….جاوبني عافاك…؟
دابا سي المهدي… ما بان ليك غير المقاولات الإعلامية العائلية لي فيها الأقارب…
بان ليك فلان مخدم مراتو… وفلان مخدم ختو وخوه…
بغيتي تطلع عايق… فايق رايق..
ألم تر كل الأقارب وذوي القرب الماليين والخفيين في كل فج في حكومتكم…؟
سؤال: الله يخليك… واش شغلك…؟
هل هناك قانون يمنع رب المقاولة الإعلامية من أن يوظف رهطه وأهله…؟
فين عندك المشكل…؟
بينك وبين المقاولة الإعلامية: مساطير الدعم وفق الاجراءات التي وضعتها… رغم قساوتها….وعارفين آش مزومي…
والباقي… ما شي شغلك… يخدم كن شاء وفق القانون…
لي شغلك….هو تجاوبنا… فين وصلوا المخيمات التي أغلقت باسم الصيانة وإعادة البناء…
فين وصل ملف التخييم والثقافة والفن… والمسرح الذي أصبح يقتل
فين وصل ملف قطاع الشباب… الذي تم إغراقه بتكوينات لا نفهم لها راس ولا رجل…
غير… لي حلم… بشي موضوع… ينزل تكوين… بلا رؤية بيداغوجية
خلونا في الإعلام…
بغيت غير نسولك… ما هو المبرر القانوني والظرف القاهر لتعطيل تجديد هياكل مجلس الصحافة…؟
بغيت نهدر ف هذ الموضوع….
خليني ساكت…
حيث أنت عارف علاش… و عارف سبب هذ تجرجيرة…. وأنا عارف ما خفي…
المهم…. ماشي من حقك تطرح فزاعة… الأقارب في المقاولات الإعلامية…
لا تزايد…!
راه… ما شي عيب الزوج والزوجة يديرو مشروع إعلامي…راه العيب هو إيديرو إيدهم في جيب الدولة…
راه المشكل… هو حكومة تحولت إلى ملحقة لشركات صاحبك…
والعيب هو أن تصبح الدولة خدامة عند ” تجار الدواء ” الجدد، وقناصي فرص الاستيراد… وزيد وزيد…وأن تتكيف الدولة وفق طموحات صحابنا…
من اللحم حتى الزيت والفيول ولافوكا والكافيار…
لي عايب… هو تعاير الناس بوسخ العتبة… وأنت عتبتك مكلعة….
سير دور… بدل الموطور… راك زوين طيب الأصل غير غير الصباغة ماديالاكش…
براكا من المزايدات… وقص الشريط الأحمر…والضحك للكاميرات…
وعاود معنا اللعب…
ما بقى قد لي فات..ولنا معكم موعد والتاريخ…
سلم على رايس البرلمان مني يجي من غانا…
راه… القضية حامضة… واخا مشى لغانا….
راه… باقي ما ساليناش معاه….
راه… خاصنا لفلوس… الكساد أصبح له لسان، والفساد أصبح له لغة وبيان..