هاذي خذوها مني بالتحقيق .. نهار يعيق المجتمع ويفيق .. غادي يرجع من نص الطريق .. باش يحاسب ذوك اللي صاطو ليه في وذنيه التخربيق .. حتى خلاوه يفرط في اولادو .. يركب عنادو .. ويكمل بلا بيهم مسيرة التفريق .. ما بين الصحاح وقلالين الصحة مرة بالنخال ومرة بالغميق .. وكمل من راسك يا لبريق.
الدنيا بحال شي حلقة في ساحة جامع لفنا .. وهكا ولفنا موالين لْفَاعْ بوحدهم .. شرَّابين الما طايب بوحدهم .. وموالين احماد وموسى بوحدهم .. وموالين الأزليات والحجايات بوحدهم .. وأنا فين ما حاجيتك .. تدور عليا وجهك .. وتقول ليا لاش جيتك ..؟
أنا معاق .. ويلا جيتي تحقق تحماق .. صابني بها الله وما اختاريتهاش بيدي .. وأنت علاش غادي تحاسبني يا سيدي .. هانا كنبكي عليك في يوم عيدي .. كنشكي عليك ولقيتك مضرك عليا بحال إيلا لاعب معاك الزديدي .. إيه وشكون يخلص عليا هاذ الكريدي .. آش بغيتي الحياة تبقا تسال فيا كلشي .. فينا هو تعليمها .. وتكوينها .. وإدماجها .. وتشغيلها .. وتغطيتها الصحية …. ليا وليك الله يا وليدي.
شهد يا طه حسين يا روزفلت ويا بيتهوفن .. هاذو قلبو علينا بالفن .. دارونا حنا بحال إيلا ما كاينينش هن .. ما مسوقينش وخلاوك أنت تهرنن .. شدو يدينا لواوها .. بحال شي صفحة وطواوها في كناش السهو …. هي حكاية ورواوها .. وفرضو على الزحاف ينقز الحيطان .. والأعمى يخيط الكتان .. والصمك يسمع حس الذبان .. والزيزون عيا ما يعاود ويتسراح في حكاية زمان .. على آش واقع تحت قبة البرلمان.
مشرعين فمهم حتى لهنا .. ونساو القوانين اللي تضمن لهنا .. خلاها ستيفي ووندير : ” ابنادم ايلا عماه الله .. ماشي زعمة راه ما بقاش يشوف ”
معازلين علينا .. ومخلينا في التوش .. واش حنا ما نلعبوش .. قتلتنا غ الغمولية في البرتوش .. حشمنا وعركَنا وقطعو علينا الما ديال الدوش .. واش زعمة باقي ما حشمتوش .. تلقاو لينا شي بلاصة في قلوبكم يا اولاد لفشوش.
كتب في السبورة .. هاذ جوج سطورة .. إيلا ما لقيتي مع من تلعب الكورة .. غوت على حر جهدك لمنتخب الأطراف المبتورة ..
خلقنا الله يا وليداتنا .. باش نكملو بعضياتنا .. اللي ناقصة فيا أنا .. كملها أنت .. كلنا مسؤولين على تعمار الشوارج بالهضرة .. باش تبقى زعمة الدنيا خضرة .. فوق هاذ الأرض السعيدة .. وأرى ما عندك .. زرع هنا وريدة .. وغرس هنا قصيدة .. والعيب جد العيب هو تفش الرويضة .. وما نلقاش من يصاوبها .. وراك عارف تصاويب لخواطر فريضة.
ما تلقاش شي واحد في الدنيا غير زايد هكاك فابور .. ضروري يلعب فيها شي دور .. باش تبقى عكارب الساعة كتدور ..
سبحان الله بحال إيلا أنا اللي اخترت نكون معاق .. لويت رجلي حتى سمعت طرطلاق .. ورضيت نعيش برجل وحدة في محرك السباق .. هوما عاطينها للتعلاق .. ومخلينك أنت وراهم تجري وتجاري وتقول ما جريت في أرض النفاق.
أنا بعدا من هاذ العيد .. قررت نبدا عهد جديد .. جاتني عيب نبقى بحال شي نخلة .. نايضة في الخلا .. وسمحات في تمرها والجريد .. اللا أنا غادي نضارب نكحز ونزيد .. ما عندي علاش نبقا هارب .. لهروب ما عندو باش يفيد .. بغاوني نكرم من الخاطر .. ويحطبوني كيف لوكَيد .. وذيك الساعات ما غادين يخسرو عليا والو .. لاخطا يقرعو فيا لوقيد ..
بقات قطرة وحدة .. وكاس لمرار يفيض .. اللا أنا هاذ المرة .. غادي نصاوب بهاذ الليد .. فلوكة ونعكدها بسلوكة من لحديد .. نهرب من موتي ونخلي شاهد لقبر ورايا فريد .. ضد في كاع اللي ربطوني وما خلاونيش نزيد .. باش نبين ليهم أن حتى التمرميد .. كيصنع الناس اللي تقدر تفيد هاذ لبلاد السعيد.
أنا بعدا قادر نكون عافية .. تحرق بلسانها لمحافية .. وجلايل النكران الوافية .. إيلا كانت مجامر بر لمان دافية .. ولقيتو فيها لامان وغير بوحدها كافية .. دابا تهبا وتعمي برمادها العين الصافية..
شفتي إعاقة الذات بالذات ليها الدوا .. أما إعاقة الروح إيلا بدات هاذيك هي اللي ما ليها دوا.
